يامترفه ما أقول أشوفك على خير

بس أذكرك بالخير يالياسمينة

حتى لو أنك غير.. واطلالتك غير

فجرٍ فهق لون المساء عن جبينه

واللي يقول أنا هواي الغنادير

عز الله أنك صدق تملين عينه

غيداً تشبين الولع بالتفاكير

يافتنة الغافل عسى الله يعينه

والخاثر اللي ما يجي منه تقصير

مدري وش اللي حال بيني وبينه

ضيفة ولك عندي كرامة مسايير

يذبح لك الخافق قبل تذبحينه

ما جيت أغني قصة (أمك على البير)

ولا قلت ياويلي على البنت.. زينة

ما هو خطا حتى أقنعك بالمعاذير

هذا شعور اشواقي المستكينة

والخطوة اللي ما تمل المشاوير

سرى بها ليل الغرام وحنينه

لا تحسبيني من حساب المداوير

الريح ما حرك شراع السفينة

شاعر وتضحك لي وجيه النواوير

في ساعةٍ فيها الفيافي حزينة

أطلق خيالي للمسافات ويطير

حتى يلم الفكر في راحتينه

وأجي وتحفظني قلوب الجماهير

واغيب وتقول الجماهير وينه

انسان لكن فيّ من نزعة الطير

أحيان أحس أن الفضا لي مدينة

وأنا يابنت الناس حتى الأزارير

أحسها مثل الدروع الحصينة

خليني أرحل في معزة وتقدير

يا مترفة ما هو بأنا اللي تبينه

- ضيدان المريخي