مرثية من الشاعرة نوح الحمام في والدها رحمه الله واسكنه فسيح جناته:
الله يرحم طيب الذكر والصيت
اللي بوسط القلب ماله وزيني
يابوي يوم اقفيت ماكنّك اقفيت
ذكرك وطيفك كل يومٍ يجيني
ياكم على شانك من الدمع هليت
صبري قضا والحزن بيّح كنيني
قلبي يعزيني وانا اليوم عزيت
نفسي بعد ماصار زولك دفيني
لامن ذكرت اني بضفك تربيت
عيني تهل الدمع في كل حيني
يابوي من عقبك ترى ماتهنيت
مالي جدا ياكود جر الونيني
يابوي بعدك موحشة ربعة البيت
في غيبتك يابوي مالي عويني
اشتاق لك شوقٍ يهز المثابيت
في كل ساعه غايباً ياضنيني
يابوي بنتك جرحتها التوابيت
جداي عبراتي.. وفرك اليديني
اقفى النعش عني وانا عنه اقفيت
وانت بوسط نعشك تناظرك عيني
يابوي انا في غيبتك : ماتعاليت
هذا حكم ربي ماهو في يديني
وعند السؤال الله يثبتك تثبيت
ويكتب لك الجنه مع الصالحيني
الله يرحم طيب الذكر والصيت
واطلب من الله عقب فقدك يعيني
- نوح الحمام ( بشاير )
