أقدّر موقفك واعذرك.. واذكر عِشرتك بالخير

واكرر شكري وتقدير قلبي.. يا بعد قلبي

واقول آسف على حزنك على بعدك على التقصير

حبيبي ليه ألومك واشتكي واحمّلك ذنبي

انا واضح.. ولكن ما املك القدره على التعبير

أمانه.. عش حياتك واترك همومي تسافربي

حياتك تستحق التضحيه والصبر والتفكير

حرام يضيع حلمك.. يا رفيق الدرب في دربي

انا كان اعتراضي كيف مثلك خانه التقدير

وكيف تروح ما فكّرت في حبك وفي حبي

بلحظه كيف صرت أقسى من الفرقا بلا تبرير

وانا اللي ليلة فراقك.. بغيتك تاقف بجنبي

اذكّرك بغلانا والغلا ما ينتظر تذكير

تذكّر وانت في عزّ الفرح.. ان الغلا قربي

تصاحبك السلامه والأماني.. يا نصيب الغير

انا كل الكلام اللي بقوله.. يحفظك ربي

ويبقى قدرك اكبر في عيوني.. والزمان صغير

ولو ما قلت احبك.. كل يوم يقولها قلبي

- الشاعر/ الأمير د. سعد آل سعود (منادي)