القصيدة والأغنية ثنائي ثابت في تاريخ (الشعر والفن)، وهذه زاوية نقدم لأحبتنا ومتابعينا قراء (مدارات شعبية) من خلالها -استجابة وتفاعلاً مع الرسائل التي ترد إلينا - أجمل القصائد التي قدمتها أعذب الأصوات.. وفي هذا العدد نقدم نصاً للشاعر عطاالله فرحان بصوت الفنان طلال سلامة:

يا رقيق المشاعر وين راح الحنان

ليه ما شلت قلبٍ طاح قدَّام عينك

الزمن هو زمانك والمكان المكان

وآخر الشعر كلمة تسألك عنك وينك

من تقهويت صوتك سولف الزعفران

عاد وشلون فنجالٍ تمدّه يمينك

تذكر شلون كنَّا والزمن كيف كان

يوم لا غبت عنِّي ما أسمع إلاَّ ونينك

أشعر بخوف ما أدري كنت أحس بأمان

يكفي إن جيت يمّك طار فيني حنينك

وش كثر كنت وافي واقرب الناس خان

بس اثق فيك حتى لو عيوني تدينك

زان عمري بقربك يعني الوقت زان

حتى جرد القصايد ربّعت في يدينك

طول عمري وانا لاوي ذراع الهوان

شفت يومك بعيني منهو يقدر يهينك

ما اذكر إنِّي نسيتك واذكرك من زمان

واذكر إني ضحيّه بين قلبي وبينك

تدري وش جابني لك لا تقول الحنان

جيت بشيل قلبٍ طاح قدَّام عينك