يا ملاك الروح قولي كيف طاعتك السنين
جاوبيني لو تكرمتِ على هذا السؤال
كل عامٍ تكبرينه في عيوني تصغرين
ما تزوّدك السنين الا النعومه والجمال
فيه شيٍ بك جذبني غير شوقي والحنين
شي مدري ايش لكن كنّه ينادي تعال
انتِ اللي لا بتسمتِ ما بقى وجهٍ حزين
وانتِ الظل الظليل ونبعي العذب الزلال
من عرفتك كل قاسي نتبعه حتى يلين
من فضل ربي قدرنا فك عقدات الحبال
ابتعد عنك واسافر ما أحسّك تبعدين
ابتعد في واقعي عنّك واشوفك بالخيال
انتِ النبض لخفوقي وانتِ الكنز الثمين
كنزي اللي ما يقدّر يا حياتي بأي مال
أقبلي يمّي فديتك واطلقي كلتا اليدين
ياسعادة دنيتي هاذي ويا السحر الحلال
الليالي لا خلت منّك تعيي لا تزين
كل لحظه من غيابك كنّها عندي ليال
- الشاعر: صالح محمد العنزي
