الشمس والشال
مدري علام الفرح ما له بقلبي نصيب
والناس تدله على طول المدى بالها
أعيش في غَفْلَةْ الحاضر شعور الغريب
وأغيب عن كل من حولي على اطلالها
وأشوفها باحتضار الشمس عند المغيب
وأذكر ربيعٍ نسى لونه على شالها
وأبكي بصمتٍ من أعماقي وجرحي عطيب
وتمر الأيام وهمومي على حالها
يا فهيد دامك من ديار الحبيب قريب
جب لي خبر.. من عيونه لو تعنى لها
خذ صورة في خيالك في غياب الرقيب
وأغمض عيونك عليها وأحفظ أشكالها
وليا لفيت الوطن يا فهيد خلك لبيب
وأطلق عَنان الخيال وجر موالها
هو يلثم الخاتم المحظوظ كَفٍ خضيب
ولاَّ تذُوب المرايا شوق لاقبالها
ولاَّ تناسى نجوم الليل كونٍ رحيب
وتهيم في شعرها المشغول في خالها
ولاَّ ينام الخجل من فوق غصنٍ رطيب
ينثر حنانٍ يحسه كل من جالها
اغار من كل حرف زار ثغر الحبيب
وأغار من لثمة الشفَّة لفنجالها
وأغار من دمعها وقت الفراق العصيب
إليا التجتْ للوسادة تشكي أحوالها
وأصيح مظلوم يا عالم ولا من مجيب
لو لاحت الكلمة بعينه ولا قالها
طاريه عندي يسبب رد فعلٍ عجيب
وله صورةٍ في خيالي ما حدٍ طالها
- الشاعر: ماجد الشاوي
