صدى الماضي
الله أحد ياتل قلبي من اقصاه
تل القطيع اللي شعوه الطماميع
شعوه من مفلاه حزَّة معشَّاه
وتالي نهاره ظرّبوه المهاييع
ومرّوا به المتياه من عقب مضماه
واقفوا يلوعونه مع الدرب تلويع
غب المراح وراحته طال مسراه
واصبح على فاله بخبث التواقيع
اوتل زملوق الشفا يوم لوّاه
لا هوب صيف وحاميات الذعاذيع
على عشيرٍ عوقتني هواياه
بسهوم نجله ضيّع القلب تضييع
في معترض سوقٍ فجاني مفاجاه
والحق عليّه باعتراضٍ وترييع
واقفا يحسب اخطاه طرب لممشاه
وانا مخليني جضيع التواجيع
يدير عينه بي وهو يدرج اخطاه
واشارلي بمخضبات الاصابيع
بدرٍ بدا من وادي الغي منشاه
جهرٍ غشا ضوحه لنوره شعاشيع
الخد برقٍ ناض نوّه بمثناه
ينشاف في عمق الطها له تلاميع
المترف اللي مخلفتني سجاياه
يفتل وينقض ما لهرجه تسانيع
ابو ثليلٍ فوق الامتان يغذاه
بالمسك وينقّع له الورد تنقيع
يشدي سبيب كروش وصفه وحلياه
لا سمعت الصيَّاح وقت المفازيع
سمعت نجانيج العرب والمناجاه
مع قول دن المعرقه والمصاريع
متبصرٍ ربي بخلقه وسوّاه
لا هل الهوى زود امتحانٍ وتوليع
وعرفت انا مضمون قلبه وقصياه
وانا لما يهواه سمّاع ومطيع
وانا زبون الترف لو غلى مشراه
اسوق به من باب مصرٍ إلى الريع
وصلاة ربي عد خلقه وطرياه
على النبي الهاشمي خير من طيع
- الشاعر: عبدالله بن حمود بن سبيل
