يا مرحبا باسمٍ على المجد عنوان
بسم الذي ميّز وطنّا بالايمان
واللي حماه من الفتن والبلاوي
واللي جعل شعبه على الملّه اخوان
من بعد ما كانوا شتات ونحاوي
جاله معزِّي والثقه فيه برهان
حتى انجلت عنه الفتن والدعاوي
واستانف التاريخ تاريخ ربّان
عهد الأمن والعز عهد الرهاوي
من بعدها ارحّب بالأمير سلمان
ترحيب فيه الهيل والعود جاوي
يا مرحبا باسمٍ على المجد عنوان
زيزوم ومحنّك وكفٍ نداوي
نلت الثقه لك من ملكنا كحيلان
ومن الوفا حققت كل الهقاوي
غيبتك عنا غيبة السيف شامان
سيفٍ على جسر المهمات هاوي
اعطيت معنى للوفا بين الاوطان
ورجعت من جم العلاقات راوي
شرفت ماقفنا على كل ميدان
حتى ثبتنا فوق قاع امتساوي
جتنا البدايل بين ساسه وبلدان
في شرق وإلا غرب شدنا عراوي
ما دام توقيت البدايل لنا حان
نبني علاقتنا بعقل وتراوي
متجوّدٍ يا مير في خير الاديان
منهجك دين المسلمين السماوي
والعالم اليومه على فوه بركان
كلٍ يحرِّض مدّعين الفتاوي
شفنا وش اللي صار بأسباب الاخوان
عرقٍ نزف بين الكبد والكلاوي
واللي حصل في سورية وارض لبنان
خلا المواطن عن دياره جلاوي
والمملكة في حفظ خلَّاق الاكوان
ومواطنيها بين خير ورخاوي
دارٍ شربنا درّها المحض صبيان
والله لناقاها من أهل المساوي
واحنا من سموك حواضر وبدوان
ناخذ شجاعة قلب وعزوم ناوي
والعز بالله ربنا عالي الشان
ثم المليك القرم منصى العزاوي
الشاعر/ د. محمد بن حمدان المالكي
