رزق العجاجه
البال سجل للهجوس احتجاجه
ما عاد له في لجة الهرج مردود
البر ومخاوى النشاما مزاجه
يطيّب له خوة هل الطيب والجود
والشعر للطيب طليقا حجاجه
ويم الردي ماله مزاجا ومجهود
الحر حرا والدجاجه دجاجه
ولالي ورا مدح الرديين مقصود
ما بيك يا رزقٍ تجيبه عجاجه
و ما كبر الاحلام في رزة العود
مجنباً راع الردى والعواجه
ماني على عوجان الالسن بمحدود
عرف ذبيل الهرج واعرف خراجه
والناس فيها طيب الحظ محسود
الماء قراحه فارقن عن هماجه
والمفتهم في ذالزمن صار معدود
رفيقي الطيب ما ودي حراجه
والا ترا ماني عن الهرج معقود
كثر الحكي من غير معنى لجاجه
الصمت حكمه وكثرت الهرج منقود
ومدحك لنفسك بالسوالف سماجه
لاصار مابه فعل ما في الحكي زود
ولا تذل نفسك لجل قضيان حاجه
حاجه تهين النفس ما منها فود
وصبرك على همك دواه وعلاجه
الصبر في الشدات ناتجه محمود
لين الله يعجل عليك ان فراجه
باب الولي مهوب للعبد مسدود
الصدر في ذكره يزيد ان بهاجه
ومن صد عن ذكره شقياً و مقرود
- سعد الشقحاء
