لا يزعلك حزني
لا تنشديني عن سبب حزني ولا أبغى تسألي
وش ذنب قلبك يحتمل هم عن عيوني جَلا
عصبٍ على عيني تذكّرت الزمان الأولي
لين غلبتني ذكرياتي بالزمان الأولا
العيشة الِّلي فرقتني عن خواني عن هلي
أشد من فتك الرموش الظافيات الكمَّلا
واللي خلقك وثبّتك بين الضلوع النحلي
إني بليّا شوفتك كنِّي بعمري مُبتَلا
لا يزعلك حزني أبد فرقاك حزني وزعلي
ورضاك راس المال والدنيا بها صن ووَلا
حبيبتي يا بعد رأسي صدق يا مستقبلي
تستاهلين الطيّبه ولا عَدم ولا خَلا
يا وصفة القاضي.. وابن لعبون وصف العبدلي
يا قرّة العين ومناة الروح.. سبَّاق الحلا
يا شعر شاكر للمطر يا فخر سورٍ بابلي
يا ذكريات النصر والتحرير وأيام الجّلا
غبتي نهار وكنّها فرقا وقرّب مقتلي
الا على عمري بعد ما غبت ماشِرب وكَلا
يا كثر ما احتاج البُكا ولضمَّه الصدر الخِلي
وأحيان أحس إن البكا سلطان والدمعة ولا
العمر رَوَّحْ.. والبياض يْلوح.. والطيب غِلي
ولولا الفلا يا ريم ما نادوك يا ريم الفلا
أنا كِذا حَتى تعالي يَمّ قلبي واسألي
لو تسألين جروح قلبي هو كِذا.. قالت بَلا
الشاعر/ علي بن حمري
