تاج الزود
ترى الثقة بالنفس ياهل العرف هي تاج الوقار
في شرط ما تحظى بزودتها ولا باعجابها
حيث إن تاج الزود مثل النقص في كل اعتبار
كم من عزيزة في ثرى الغبراء يحط انصابها
دام الوسط مذكور بالدستور ياأصحاب الخيار
الحكمة اللي نزلت بكتابنا نرضى بها
من قال أنا خير الملا شاله عدو آدم وطار
امسى بدارٍ تنسف الغربي دقاق ترابها
فرق البشر بعقولها والكنز من دونه ستار
للقلب خزنة واللسان بحرف يفتح بابها
على الرجل من منطقه راع النظر يصدر قرار
يكشف نوايا الغاية اللي مغلقٍ دولابها
من لايحكّم منطقه عن رمي فاقدة العيار
البندق اللي باللقا تحذر ولا يرمابها
يابي يشوف النقص في قدره بميزان الحرار
النفـس يرفع شانها تقديرها لاصحابها
هذا نبا اللي له بسوق المعرفة صرح ومسار
يشفق على الجزلات والهزلات يقفل بابها
له بالنقا صفحات بيضا ما تعلّاها الغبار
إلا أن نفسه مايزكيها على طلابها
عاش بمراحل مدرسة علم الحياة ام الكبار
اللي تخرج في شهادة طب من يسعى بها
فيها السعادة والكدر والغند مع كاس المرار
احداث شتى في مصادر نوعها واسبابها
ياما يدور بخاطره لين الفلك فيه استدار
على فقوده في روابي نجد مايسلى بها
عمار ياعصرٍ مضى يطري على بالي عمار
ايام وإن دورت سجة خاطرك تلقابها
- حماد مريزيق البشري
