Monday 07/10/2013 Issue 14984 الأثنين 02 ذو الحجة 1434 العدد
دخيل حسنك
شعري فداك انت يا متعب مساييرك
طالت مشاويرهم بالوصف يمشونك
أتعبتني وصف وانت اتعبت تفكيرك
والله مالك مثيلٍ ريّح ظنونك
ماني مشبّهك ما احدٍ يشبهك غيرك
كم جيت اوصّفْ.. وطاح الحرف من دونك
من قيد رمز البَهَا.. هاموا بتحريرك
ناسٍ كثيرٍ وعجزوا لا يضاهونك
حتى انت عن إنت ينقص بعض تقديرك
على الأقل يا أخي بعيون مجنونك
حبّيت شرّك على رجوى.. يجي خيرك
واغليت لثم الشقا والموت لعيونك
أدري بك إن جيت تتجاوز تباشيرك
بس البلا الشوق جرَّح صبر مظنونك
تنازعتني عليك الله محاذيرك
قيّدت رجلي عن الخطوات بظنونك
لو في يديني قتلت أسباب تأخيرك
دخيل حسنك ترفّق بي.. على هونك
الشاعر: ناصر السبيعي
