يابو فهد هذي القصيده على شان
نعلن ولانا للجميع وعهدنا
مرَّت عليك من المتاعب والأحزان
ولولا الحدث يا سيدي ما قصدنا
حزنك على فهد ونايف وسلطان
وأكبر عيالك وأمهم يا سندنا
خلاّ القصايد ما لها ألحان وأوزان
ولا توفي بحقك ولو اجتهدنا
الله يرحمهم ويجزيك الأحسان
ومحبتك بقلوب الأقصى والأدنا
وحنا ماهو من اليوم من ماضي الأزمان
لا من دعينا للطلب ما قعدنا
مع ولاة الأمر في سر وإعلان
بالسمع والطاعة ونحمي بلدنا
وحنا هل التوحيد وإن ثار دخان
وكم مرةٍ مع السرايا وردنا
بعناقنا بيعه قديمه وإلى الآن
نوصي به أنفسنا ونوصي ولدنا
عهدٍ من الأجداد وأيام الاخوان
بدمينا يبقى مع اللي بعدنا
هذا وصلى الله على نسل عدنان
ولله سلمنا وشكرنا وحمدنا
الشاعر/ منصور بن محمد بن منيخر
