انتقلت إلى رحمة الله تعالى والدتي (ميثاء صالح الخريجي) يوم الجمعة 2-8-1433هـ وقت أذان الجمعة.

أرفع تعازي الخاصة إلى خالتي والدة خالد المالك و أخي منصور وأخي صالح وإلى شقيقاتي، وأحفادهم وإلى أسرة المالك والخريجي.

وأدعوا الله أن يرحمها ويسكنها فسيح جناته إِنَّا لِلّهِ وَإِنَّا إِلَيْهِ رَاجِعونَ .

يالله ياللي مالغيرك ترجيت

يافارج الكربة لروحي العليلة

اغفر لمن راحت وخلت لنا البيت

المجمع اللي كل صبح نجي له

من راحت أمي ما بنومي تهنيت

وجدي عليها وجد يوسف لأهيله

وجدي عليها كل ما صبحت وامسيت

وجدي على جمع الضحى والمقيله

من يوم راحت اظلمت حارة البيت

وكل الرياض أظلم بليلة رحيله

يالموت ياليتك عن أمي تغاضيت

ليتك تركته لي وتلقى بديله

ليتك تركته لي سنين واغضيت

أدخل عليها بدارها كل ليله

أنا أشهد إنه قبلة الحي والميت

وأنا أشهد إنه ما خلق له مثيله

وأنا أشهد أني لو تحاملت واخفيت

حزني تون الروح حيثه عليله

والقلب يشكي حرته بعالي الصوت

حيث الفراق احرق قلبي فتيله

والله لو الموت يقبل تمنيت

أفداك أنا بروحي وأقول ارخصي له

روحي وعمري وكل ما املك لك اعطيت

بس القدر لا جا نصا اللي يجيله

الكل يدعي لك دعاء الحي للميت

والكل من فقدك دموعه هميله

حتى الخدم تدعي وتقول آه ياليت

الموت جنبها ودور بديله

مامر سايق لدارها أو لفى البيت

إلا لقى ربعه ببابه دخيله

تعطي وتكرم ما شكت يوم لاجيت

هذا الكرم والجود طبع الأصيله

يالله لا تحرمه عطاياك لاعطيت

وافسح لها بقبره ونور ظليله

وبجنة الفردوس ابني لها بيت

قصر تحيط به الحدايق خميله

وصلاة ربي عد ما قلت وابديت

وعد الدموع اللي ذرفته هميله

وعد الليالي ليا ذكرتك وونيت

ونه ما تحملها الخيول الأصيله

على النبي اللي لحوضه تمنيت

يسقيك من حوضه بجنه خميله

ابنتك الملتاعة أم فارس منصور المالك - حصة إبراهيم المالك