اليوم وصلت لي الاخبار
وللحزن بحروفها طنة
قلت اخبروني وش اللي صار
للقلب من هرجكم رنة
قالوا لي النايف المغوار
نشرات الاخبار ينعنه
قلت آه والعقل مني طار
وجريت ونة ورا ونة
والدمع من ناظري مدرار
والقلب الاحزان تلنه
مرحوم يا وافي الاشبار
مرحوم يا ناصر السنة
يبكيه شعبه صغار كبار
وسهام الاحزان يكونه
وانا بكيته بدمع حار
وابياتي بحزن يرثنه
نايف هو النايف البتار
باوصاف خمسة حفظهنه
الحزم والعزم والاصرار
والطيب والجود يكفنه
أوصافه تحير الشعار
أوصاف للمجد سمنه
معروف بالصبر والإيثار
واسمى صفاته حكت عنه
سياسيٍ ماهرٍ مغوار
وبسياسته ما اختلف ظنه
شهم على أمننا سهار
كن الوطن قطعة منه
ودخان الارهاب يومه ثار
سطوات نايف يطفنه
وجناح عدونا لاطار
عزمات نايف يقصنه
على العدو كنه الإعصار
وقلوب الاعدا يهابنه
وعلى صديقه حنون بار
ويدين عطفه بسطهنه
رمز الشجاعة وبالمضمار
هومات نايف يزمنه
وبه همة عالية ووقار
والفوز بالمجد هو فنه
حَبّ التميز وصار شعار
لامجاده اللي يبارنه
نحبه بسرنا وجهار
وقلوبنا منه ممتنة
يا الله يالواحد الغفار
يا صاحب الفضل والمنة
تجعله مع زمرة الاخيار
باعلى الفراديس بالجنة
عطا الله بن سليمان العطا الله -الزلفي
