واليوم عنا راح والقلب ملهود
ودموعنا في عيوننا له تهايف
الشيخ بندر بن عبدالرحمن بن ماجد الذويبي غاب عن الشعر كثيرا ولكنه عاد محملا بالولاء والحزن في فقيد الأمة نايف بن عبدالعزيز:
بندر بن عبدالرحمن بن ماجد الذويبي
يالله يالمعبود ياخير معبود
ياواحد سامع وعالم وشايف
تجبر عزانا ياذرى كل ملهود
لو كان ماينفع كثير الحسايف
رحل سليل العز ومسطر الجود
نايف ولامثله على الارض نايف
درع الوطن لاثار بالجو بارود
من قوته ينطح كبار الكلايف
بشته ذرى للي من الضيم محدود
يبشر بنايف بعد ماكان خايف
وجهٍ به الامجاد والعز معقود
ياقف مواقيف السعد مايسايف
راس الامان وينطح جيوش وحشود
وعلى العدو يرسل جيوش وقذائف
الخوف بقلوب العدا منه موجود
واللي طمع به راح هايب وعايف
ريف المواطن باسمه نزود ونزود
اللي على شعبه عطوفٍ ورايف
ولي عهد وفي يده سيف مجرود
وماحافنا بالحقد والشر حايف
بفعله نغيظ المعتدي لينه يعود
وباسمه تعلينا بكل النوايف
له ماقف بالعز والجود مشهود
وتشهد على فعله جميع الطوايف
واليوم عنا راح والقلب ملهود
ودموعنا في عيوننا له تهايف
ومدام ابومتعب على الحكم موجود
لاراح منا نايفٍ حل نايف
سلمان راس العز ومشابه العود
والكايده لاقام فيها خفايف
واحمد على اسمه كاسبٍ كل محمود
اقولها والكل عارف وشايف
حكام عز بجودها دايم تجود
وعلى معاديها تزيد الحسايف
وغلطان من قال الامن صار مهدود
حنا حماة الدار عن كل خايف
دون الوطن ننطح جماعات وحشود
وضد العدا نمشي على نهج نايف
وصلاة ربي عد ماهبت النود
على رسول بأمته كان رايف
