هني قلبٍ دالهٍ دايم الدوم

تمضي حياته بين ضحك ووناسة

خالي ولا عنده هواجيس وهموم

الى شرب فنجال طيّر عماسه

لا مشغلٍ فكره ولا هوب ملزوم

بمتابع اخبار الفضا والسياسة

بالليل له راسٍ مثل راس حمّوم

اللي خذا الشهرة بكثرة نعاسه

عقب العشا يطرب ويشتاق للنوم

يغط في نومه الى حط راسه

لا شك ما يكتب على العبد مقسوم

دنياً تقلب ما عرفنا قياسه

دنيا كفا الله شرها لو صفت يوم

اليوم الآخر في هم وتعاسة

كم واحدٍ لو كان من نقوة القوم

يصبر على الشدات من قو باسه

لا شك من غارات بقعا به ثلوم

خانه زمانه وامترغ به وداسه

دنياك هذي بين معطى ومحروم

ومنين ما عدلتها ما تواسه

صالح بن عبدالكريم المرزوقي