الضيقه اللي برّكت بالمحاني
جتني وانا اللي ذنبها ماجنيته
اردها واقوم اغير مكاني
لكنها تورد على مستميته
واغرف لها من عد صدري معاني
عدن حفرته بالضلوع وطويته
تنبت على جاله غصون الأماني
وحلم ٍ من إحساسي ونبضي سقيته
يالله دخيلك من بلاوي زماني
واعوذ بك من شر درب مشيته
الحزن من بين العباد اصطفاني
وقلطت له صدري قصيد وفريته
وان كان ليله في كنفه احتواني
نجبت له حمرا قصيد وسريته
اهيم بدروبه واعد الثواني
والصبح ما اثقل خطوته لا احتريته
وليا اشرقت شمس الأمل في كياني
يممت وجهي للكريم ودعيته
يشرح ضنك صدري ويحفظ لساني
ويحيي بصدري كل حلم رثيته
وان قمت اناظر في وجيه المباني
ياكثر من يشبه تفاصيل بيته
وجيه من ربي خلقها تعاني
ووجيه من ربي خلقها بخيته
العمر بذل وتضحيات وتفاني
ومن طاب حظه طاب فعله وصيته
أحب نفسي بس ماني أناني
لو صاحبي يطلب عيوني عطيته
كم واحد ٍ لامن نخيته لفاني
ولاحتاجني في ساعة الضيق جيته
كم واحد لا من بغاني لقاني
لكن انا لا احتجت له مالقيته
عطالله ممدوح
