عبدالله السياري شاعر علم لايحتاج إلى تعريف أهدانا عدة من النصوص الجميلة التي نتشرف بنشرها تباعا:
جهز الموتر وكمّل لي زهابي
كان يسرها الكريم الصبح ماشي
وحمّل العزبة وعلق لي اثيابي
وارم لي لاهنت بالشنطه افراشي
لاتقول اجلس ترى الجلسه ذهابي
الفجاج اوساع والبيدا بلاشي
ضاق صدري من أقعاد ٍعند بابي
والعظام من الكبر صارت اهشاشي
أقفت أيام السعادة مع شبابي
والرجال اللي نبي راحو إطشاشي
أقرب الخلان صاروا فالترابي
والبقية في جهاد وفي معاشي
مابقى فالعمر مايضحك أعذابي
الكرى تنويش والعيشة نواشي
سجتي بالرجل مابين الهضابي
وانطلاق الشوف مع جرد الدشاشي
بين طخفه واجبله هاك النوابي
وحول أبانات الشواهيق الحراشي
وسجتي بديار حلوين الجنابي
المزيرع والصياهد والمشاشي
حول شويه والرفيعه واللهابي
والصداوي مروي الهيم العطاشي
في فياضٍ يطرد فيها السرابي
تقظب الما من مراويح الرشاشي
مع ارجالٍ همها ذبح المرابي
يذبحون مع المرابي زود حاشي
النشامى للخساير ماتهابي
وارثين الجود من عصر النجاشي
حاجةٍ فالنفس يوم الراس شابي
ذي طراة العمر وإلا الرزق ماشي
