المسأله ما هي على جرح واثنين

المسأله مبدأ وقصة كرامه

يريد أن يذهب أحقاً؟ على أين؟

وهل يريد فالهروب السلامه

قولوله إن الصاع عندي بصاعين

مابه سلامه يا حبيب الندامه

وإن قال ناسي أو تناسى أنا مين

قولوله إنه ما صدق في كلامه

ما يدري أن الغدر دايم ترى دين

وما يدري أن الجرح صعب التئامه

بعض الجروح تروح في ظرف يومين

وجروح مثل الوشم تبقى علامه

عندي على جرحه وغدره براهين

وأنه يخون وماوفا بالتزامه

يعني أكيد إنه طعني بسكين

يعني أكيد إنه رماني بسهامه

الحب دايم يجمع إحساس قلبين

تجاذبوا نظرات ولا ابتسامه

واندمجت الأرواح ما بين شخصين

والكل ذايب فالحبيب وهيامه

وإذا الوفاء معدوم بين المحبين

مالك على غدر المحبه ملامه

الله خلق فالناس طيب ومسكين

والله رزق بعض البشر بالشهامه

حتى لو ان الزين يفرق عن الشين

ما يفرض الانسان غير احترامه

ياشينها لاصبحت ما بين أمرين

ياتنتقم ولا خسرت الكرامه

ياعثرة الأيام وش عاد تبغين

متى على الله تنجلي هالغمامه

ما عاد باقي غير دمعه وجرحين

وأشلاء عاشق والفؤاد وحطامه

وتلومني لاقلت صاعك بصاعين

وتلومني لاقلت مابه سلامه

الشاعر/ متعب الثقيل