الشعر الجزل المتميز في مقام سيدي خادم الحرمين الشريفين الملك عبد الله بن عبد العزيز - أطال الله عمره وأدام عزه - هو ما يجسّده مثل هذا النص المتفرّد الذي يتناول مناقب خادم الحرمين ومواقفه الكبيرة على كل الصعد للشاعر المتميز المقدم محمد بن عايد الشمري:
مع الجمع الغفير أرفع صدى تحية الإسلام
على شيخٍ على شوفه نواظر شعبه مجيعه
نطقها شاعرٍ في حب داره هاض حتى هام
وسالت له حروف الشعر من صافي ينابيعه
تجول بي الخواطر والمشاعر تجبر الإلهام
يطيب الشعر وإن هبّت على بلادي ذعاذيعه
طواريق القصيد الشاردة خيلٍ بدون لجام
وانا وان يسّر الله في يدي عسفه وتطويعه
يا رب إنك تجمّل شاعرٍ فزّ بغلاه وقام
وتفصح له لسانه يوم يبدا ويْحصد ريعه
وقوفي يا طويل العمر قدامك شرف ووسام
ومن هيبتك ترقى هيبة الشعر بمواضيعه
خطاك السوّ يا رمز البلاد وسيفه الصمصام
عسى ما ننحرم من سلة السيف ولواميعه
ولد عبدالعزيز اللي خلق هو والجبال أتوام
لمح نجد إتباكى واحرقت قلبه مداميعه
ونادت له وشامت له وهو شدّ الحزام وشام
لها وبكفه اللي ترهب العالم قواطيعه
خطفها من يدين الجهل والآهات والآلام
وشيدّ له قصور المجد في عالي مرافيعه
على نهجه مضى عبدالله وحقق لنا الأحلام
وطاع الله بنا وشلون ما نغليه ونطيعه
اليامن ثاروا شعوب الغضب غرب وجنوب وشام
من أسباب احتقان الشعب وإجحافه وتجويعه
بفضل الله ثم بعدلكم عشنا عزاز حشام
نفز من الغلا ونجدد الإخلاص والبيعه
تحت راية أبو متعب مضينا والأمان حزام
وشربنا نهجه العادل زلالٍ من قراطيعه
أبو متعب خلقه الله لخشم المعتدي لطام
إذ ما جاه علم بحلمه يقلّب مضاجيعه
أبو متعب يا حرٍ يتعب فجوج السما وإن حام
يشوف الكايدة ويتلّها بأول مطاليعه
أبو متعب يمينه غيث يوم إن القلوب صيام
سقت كل القلوب وربّعت فينا منافيعه
أبو متعب حسامه سلّه بوقت اللزوم حسام
يعدل الميل ويجمّع شتاتٍ صعب تجميعه
حقنت الدم في دار اليمن يوم الأمور جسام
وجمعت الكل بحضورك وكلٍ تم توقيعه
جمعت أهل الخليج وساندوك اخوانك الحكام
سلاطينٍ ذراهم ردّ للحاقد زعازيعه
خطبت الخطبة اللي زلزلت وسائل الإعلام
أصابت في قلوب أهل الحسد رهبة وتلويعه
صحيح اللي وقف في واقعه ما خطط لقدّام
تطوف القافلة ويحير بين التيه والضيعه
نعم للاتحاد نخطها بالقلب والأقلام
ويخيب الطامع اللي بأمننا بيّت مطاميعه
تدور أحداث هالدنيا سريعة كنّها الأفلام
زمانٍ سرعة أحداثه تشيّب في مراضيعه
مشاهد يالله إنا نستعينك تكتم الأنسام
تحير عقول بين فعول شبّيحه وتبيعه
رخص دمّ البنادم بين غدر وجمهره واعدام
وكلٍ يطعن الثاني ويسخر من مواجيعه
كفانا الله من شر الليال ودورة الأيام
بامانك يالله إنك تحفظ الدار ومرابيعه
تمسكنا بشرع الله وصرنا للحرم خدام
وشرّفنا بصون كتابه وطبعه وتوزيعه
تمسكنا بشرع الله وطاولنا به الأنام
ونهضنا باقتصاد الدار بفروعه وتنويعه
تهلّ الخير ميزانية الخير وتفيض انعام
تعمّ الدار وأهل الدار وإنتاجه وتصنيعه
ولا نساوم على نهج العقيدة وتهبا السوام
وجمعٍ ما صفت عقيدته يا قرب ترويعه
تحت أمرك جنودٍ نرخص الغالي ولا ننضام
نشيل أرواحنا بكفوفنا لرضاك ونبيعه
اليا منّه بغى الباغي جهل واغتر الأوهام
علينا يا طويل العمر ترويضه وتسنيعه
اليا منه دعا الداعي نقوم وتثبت الأقدام
ويخشانا عدو الدار ونفرق مجاميعه
تشوم الجادل اللي وجهها ما غطته بلثام
لعينك زينت باوصافها لفتة وتفريعه
يا ما اصعبها على الحساد والعذال واللوام
على غيرك حرامٍ لمسة أيديها باصابيعه
وعسى الجنة ملاذ الفارق المتمرّس المقدام
أبو خالد يا صعب فراقه ويا مرّ توديعه
سليل الطيب رمز الجود الأول كافل الأيتام
كفل تاريخنا نحت اسمه ونقشه وترصيعه
هوينا قلبه الطاهر عشقنا ثغره البسام
سحابة جوده أرخت غيثه وسالت مناقيعه
نحبه ونتباهى نذكر فعوله مع الأعوام
يموت الرجل فينا بس ما ماتت مشاريعه
ضربت من الوفا أروع مثل ياالشهم ياالضرغام
دموعك سيّلت كل القلوب بيوم تشييعه
عزانا فيك وبنايف عضيدك للأمن صمّام
ولي العهد له نعلن ولانا عهد ونذيعه
أبو كل النوايف نايف الأفعال والإكرام
خذا من رأس أبو تركي مفاهيمه وتشريعه
صليب الراس ردّاع الفتن درع الوطن جزام
بفكره أرهب الإرهاب لين أمحل مراتيعه
نبارك له ونصدح بالسلام ونرفع الأعلام
ونعم الاختيار اخترت من تفرق مجاديعه
مقدم/ محمد بن عايد الشمري
