يارعشة القلب وسنين العمر قطره
في كفي اللي دموع الحزن تغرقها
عن الضياع وسنينه سقت لي بكره
يوم السنين القديمه غاب شارقها
لميس تركض ليحيى والهواء سكره
واحساس يحيى معاها ما يفارقها
يارعشة القلب قوليلي وش الدبره
الناس من غربها ضاعت مشارقها
اليوم ينبيك عما يحمله بكره
والنفس قامت بلاويها تزارقها
مع ضياع المبادي ضاعت النظره
والناس من فقرها تنعا بيارقها
الجوع كافر وأنا رجال بالفطره
لو ماعطاني الزمن بسماتي أسرقها
أخير لي من عطايا راعي الطفره
اللي عطاياه كن السم خارقها
ماني ذليلٍ يخلي الناس تحتقره
أيقود نفسه لغاياته ويحرقها
يحفر لها كل يوم يعيش به حفره
ويسوقها لضياع الين يغرقها
يانجمة الصبح طلي واكشفي الستره
شوفي وش أقلوب خلق الله طارقها
متنافره من بعض من قلت الخبره
وأدنى من الدون يمكنه يفرقها
الواقع الشرس خلا الناس منتثره
قطع محاصيلها وأيبس موارقها
والحالم المجتهد ضاعت به الدبره
غطاء على غيمته واغتال بارقها
- مانع الوايلي
