اليا حل القدر ما عنه صده

ولو حاولت بجهودك تردّه

قدر ربك على المخلوق جاري

يود اللّي جرى أو ما يودّه

ترى الدنيا ولو طالت قصيره

مصيرك راحل لو بعد مدّه

ولكن قبل ما ترحل تزوّد

ولا تغفل عن التقوى بصده

اليا منه رزقك الله بصحه

ودين وستر هي رأس المكده

فلا تغريك دنياك الدنيّه

وتمضي بين هات وبين وده

توسّط والوسط بالأمر خيره

ترى ما فاق حده صار ضدّه

عن الرزق الحلال ابحث وجاهد

تسبب في دروب المجرهده

وبالك والكسل يا ابن الحموله

نعم ما ينفعك كبر المخده

يمر الوقت والإنسان غافل

قليل أهل النفوس المستعده

تأمل بالحياة بعين عاقل

وطالع فعلها في كل بده

أحد فيها منعَّم ما يعاني

واحد دايم على ذلّه تحده

تراها ما تدوم بكل حاله

وقصر الزين بالشينه تهده

قدر واللي كتبه الله وقدر

مثل حال البحر جزره ومدّه

رسول الله وينه والصحابه

ووين الطيبه والمستبده

فنوا ما كنهم عاشوا وصاروا

وهذا طبعها قامه وشده

فعايلها تحيِّر كل عاقل

جداه يحط يده فوق خده

خلاص اعلن عن اللي فات توبه

وباب الذنب في يمناك سده

تأكد خالقك لا تبت يفرح

ويغفر ما سلف هزله وجده

كتبت الشعر والمقصود ذكرى

وعلمي من بغى الخيره يشده

وتأكد لو بذلت أقصى جهودك

اليا حل القدر ما عنه صده

الشاعر- عبدالعزيز الشهيل