دايم علومك طيّبه يابن حياد

وجمايلك فينا صعيبٍ جزاها

بالطيب لو جينا نجاريك فالماد

رجليك ما تلحق خطانا خطاها

شهمٍ على فعل المعاريف معتاد

تعطي الرجال ولا تحرّى عطاها

مانته بمثل اللي له أهداف ومراد

معطي كراب يديه باغي ملاها

ولانته بمثل الى نخي ثم جاد

ليا تجمل مرةٍ ما ثناها

ولا انت لك زودٍ على كل من زاد

تكبر بك الهقوى وتقفز وراها

ياللي بمجدك يفتخر مجد الأجداد

وامجادهم طورت شامخ بناها

وفعل الجدود ان كان ما أحيوه الأحفاد

ماتت مآثرهم وكلٍ نساها

الشاعر - غازي بن دخيل الله بن عون

طاب القصيد وصار للشعر ميعاد

سرد القوافي جت تدوّر سراها

فرايدٍ مثل العسل فوق الأكباد

الكل منهن تعجب اللي قراها

لو كان غازي مالنا معه ميراد

شهمٍ دروبه تتعب اللي مشاها

أشكرك يا غازي على رووس الأشهاد

اهديتني دره كثيرٍ غلاها

ولا هي غريبه منك يا ذخر الاجواد

اهل الوفاء دايم يغمرك وفاها

انت ولد شيخٍ كسب كل الامجاد

كل الفعول الطيبات احتواها

كلٍ بفعله مع رجال الوفاء شاد

فوق الاصيل اللي طوالٍ خطاها

يوم انها بالفعل مسرى ومهجاد

المرجله من طيب راسه خذاها

وغازي على منهج سلفهم ولا حاد

كل الخصال الطيبات انتقاها

يحفظك ربي من حسد كل حسّاد

ياللي بيوت الشعر باسمك تباها

الشاعر - سهل بن بندر المقاطي