شفتها صورة وزاد الشوق شوق
شفتها والعين ضاميها روى
صورتك لاحت علي مثل البروق
أشهد إنك زين عال المستوى
يا خدودٍ ناصعة مثل الشروق
والقمر نورك على الظلما ضوى
ذابت شموع الأمل وسط الخفوق
واعلن الخفاق رحله للهوى
صار حبك موطنه وسط العروق
كل عرقٍ داخلي منك ارتوى
كل همٍ فوق همي منك ذوق
وكل جرحٍ من سهم حبك دوى
المشاعر في بحر حبك تروق
وكل ماضي للألم معك انطوى
لي فؤاد بشوفة الغالي شفوق
الحبيب اللي ملكني واحتوى
والله ان الشوق ساق القلب سوق
في طريق الحب لعيونك نوى
الشاعر - أحمد حمدان
