تفضل ترى لك بالحشا مجلس ومدهال
عسى مجلسك عامر ومدهالك اتعووده
نزلت بخفوقي يا هلا فيك بالمنزال
ترحب ضلوعي والصدر ينثر وروده
وفاحت لك اطياب الهوى والعطر لك سال
بخوره يعانق في قدومك دهن عوده
تفضل وخذلك من صميم الغلا فنجااال
ولاني شحوح فيه ابا اوفيه وازوووده
كرامة لوجهٍ شفت فيه الحلا قتال
وصوف الحسن داخل نواحيه موجوده
احبك محبة صادق ما عرف يحتال
لحبك يبي يبذل من القلب مجهوده
فداك الغلا واحلى قصايد على موال
تغرد بوصفك لا هزيلة ومنقوده
مدامك تحب الشعر انا ماني برجال
اذا ما اشبعك بوح وخواطر لها جوده
انا كلي احساس ومشاعر وروقة بال
واروق لكلامك وأتنومس على زوده
تعودت وصلك جعل بعدك ماهوب الفال
ولا لك على درب الهجر روحة وعوده
هنا منزل بين الحنايا هو المنزال
نزلته وصارت كل الأبواب مسدوده
إلى غبت كنه يصطليني حميم اللال
وإذا جيت تطري لي هبايب سماء السوده
تفضل ترى لك بالحشا مجلس ومدهال
عسى مجلسك عامر ومدهالك تعوده
ثامر بن شجاع السهلي
