ياقو قلبك كيف ماهزّك الشوق

وانا عليك الشوق بيح كنيني

اورقت لك شيح وخزامى ورقروق

وازهر عليك من التوجد حنيني

محتاج لك وحسّنِي حيل مخنوق

ما تدري انك بالحياه اكسجيني

احس بعدك داخلي شي مسروق

رده وانا مسامحك دنيا وديني

والله لو انت بضاعةٍ داخل السوق

كان استوت لي واصبحت في يميني

بس انت مخلوقٍ ما هو بأي مخلوق

ما فيه منك بالبسيطه اثنيني

واحد وتنظر ساير الناس من فوق

واللي يبيك تطق له بصبعيني

مالك شبيه ولانت بالحسن مسبوق

من رقم واحد لين رقم اربعيني

عليك صبري جرّحه حادي النوق

اقاومه لكن عليك يحديني

ماهو صحيح ان كل مطرود ملحوق

شفني وراك ولا تحلتك عيني

وشلون تطلب مني ارتاح واروق

وانا على لاماك تصفق يديني

القلب طير وشيمة أجداده سبوق

ولا عليك من الوله مبتليني

يطلع على طاريك ويفوع ويتوق

ويرده سياج الضلوع المتيني

وابل غيابك ضاق به كل معلوق

عجزت افسّر ماتسويه فيني

ما اقول انا ذاتك منزّه عن العوق

اقول بكره كل شيءٍ يبيني

واذا تبي تشره وتلحقني حقوق

اشره على شكّي وسكّر يقيني

انا دخيل الله عن الهجر والبوق

ولّا ظروفك لا تلاشت تجيني

وان كان خايلت بسما غيري بروق

ما هوب انا اللي يتبع المنتحيني

الشاعر - نهار بن ممدوح