يا ليت والله ما سمعنا بما صار
العلم شينٍ والمحطة تذيعه
صباح يوم السبت يا شين الاخبار
يوم الوطن حلّت عليه الفجيعه
شيٍ يخلّي وافي العقل يحتار
لو حاول أعصابه تعيي تطيعه
يا أمير لو هي حرب في وقت الاخطار
تشوف شعبٍ ما يحب الهزيعه
يفداك في دمه ويرخص لك أعمار
عندك خبر هذا بشعبك طبيعه
لكنها يا سيدي حكم وأقدار
قدرة ولي العرش حكم وشريعه
وشلون نحصي سيرةٍ تملى الأقطار
ريف الضعوف ولا يحب القطيعه
الراي عنده كان كثرن الاشوار
بالفعل والحكمه عدو الخديعه
وعلى المعادي سيدي سيف بتار
مواقفه وقت الشدايد فضيعه
رجواي بالمعبود علام الأسرار
يرحم سهيل اللي فقدنا لميعه
لعل قبره روضةٍ كلها أنوار
ومنزاله الفردوس بأعلى الوسيعه
وألي دعى الداعي وزاغن الأبصار
عسى رسول الله محمد شفيعه
العميد الركن متقاعد- الشاعر- عبدالعزيز بن عبدالكريم الباهلي
