يا فرحة الصقار بقفاية الصيف
ونقل الحرار اللي ينومس هددها
هب البراد وقالوا سهيل قد شيف
واهل الولع قامت تجمع عددها
يبون مقناصٍ بعيدٍ عن السيف
صقارةٍ كلٍ اطيوره جردها
ربعٍ قروم ولا تحسب التكاليف
مستانسين أناسةٍ ما بعدها
يا زين شبة نارهم والسواليف
والبعد عن روتينها مع نكدها
وأول بكور الوسم جاله ترافيق
ما ينفصل براقها من رعدها
هبّت له الشرقي بليا عواصيف
والأرض من ربي لفاها سعدها
من الساحل الغربي إلى حرة طريف
ومن الجنوب إلى النفود وقعدها
سيله مع الوديان جايله وحيف
دارٍ يمسيها ودارٍ يهجدها
ونهار تاسع شوفته بالتواصيف
غطى الجبال بخضرته مع لهدها
وتبدلت عقب الدهر كلها ريف
وزانت مماشيها على من قصدها
هذي طرات العمر مشي على الكيف
إلا المعاصي لا تجي في نصدها
وليا حفظت الدين مابك تخاليف
تالي حياتك جثةٍ في لحدها
الشاعر- مسند مازن الميزاني
