والله وطلع لك قلب صرتي تحسين
من بعد ما كنتي مشاعر عديمه
صرتي تخافين الحكي قبل تحكين
عن ماضي عشتيه قصه اليمه
ياغاليه بالحب عيشي وتلقين
بعيون من حبك معزه وقيمه
كنت اعشقك لطف وتعاطف وهالحين
شعوري اصدق من نديم لنديمه
والله لو كنتي بذا الشوق تدرين
واني على لقياك حالي سقيمه
ان كان قلتي جاك هالشوق منوين
ماكنت احسه بالليال القديمه
خايف اقول اللي بقلبي تلومين
وانا بعد تمنعني اقول شيمه
بس المهم اني على ماتودين
قلب ومشاعر صادقه ياحشيمه
قولي احبك كان لي قدر تكفين
نفسي على كلمة احبك حميمه
مادام صرتي في غرامي تحسين
خلي عيونك لجل شوفي كريمه
وليد الناصر
