لا لاح براقٍ وعينك تخايل

تحمّد الله ما يخايل لك الغير

وسرّك مدامه خلف عوجٍ نحايل

أكيد سرّك مثل ما قيل في بير

انهض بعزّك جعل ما ني بقايل

خلّك جبل شامخ وفي عزّتك طير

الطيب موقف والرجولة دلايل

والمجد موروث الرجال المناعير

ما تلحق الخيل الكديش الأصايل

ولا يسمّون الردي سالم الزير

لا يخدعونك ناظمين المثايل

ترى غلط قول ادهن السير ويسير

ما من ورى عرف المصالح حصايل

ولا بعدها رفقة نشاما وتقدير

الرجل منطوقه يفك الرسايل

لو كان صمته بعض الأحيان تعبير

لو إن كلٍ لا طيب المسك شايل

ما شفت ناسٍ شغلها تنفخ الكير

المدح مرهونٍ بفعل الجمايل

ما يربحه يا كود راعي مخاسير

والصيت يرقى بالرجل كل طايل

والعيب يقرن كل خطوة بتقصير

ما يحسد إلا من يحوز الفضايل

ولا يكتب التاريخ غير المشاهير

ومن عال تبلاه الليالي بعايل

ولا خير في من لا يجي عقله مشير

الحرف مبدأ صدق والشك زايل

يكثر غموضه لا عطيت إله تفسير

الحق مثل الموت ما له بدايل

والجرح جمرٍ في رماد المعاذير

والصالحات الرابحات الأوايل

أعمال الإنسان العظيمات في الخير

الشاعر/ طلال صالح العتيبي