ياسامعٍ ماقلت لك معك أمانه
نصيحةٍ شوري عليك اعتمدها
ترى التخضّع من اسلوب الإهانه
احسن وسيلة عز نفسك تجدها
وعيبٍ على اللي مايحدد مكانه
ويشوف نسبت قيمته كم عددها
ولاينجزي راع الوفاء بالخيانه
ونهاية العِشره على من جحدها
ولاكل رجالٍ عليه الميانه
اكبر خطى تعطى الثقة من فقدها
وكم كلمةٍ تفتح على الرجل خانه
تمسَكْ عليه ولايحصّل سددها
وكم واحدٍ خلى خليله ودانه
ضحك عليه وراح من عند يدها
وكم عبد مالٍ مايمد الاعانه
حقه من الدنيا اليا اقفى نكدها
ولاكل شخصٍ جاب غيبه لسانه
خص القلوب اللي تخفي حسدها
هذا وغير اللي تقدم بيانه
امرّ من ما قلت لو قلت وأدها
مزوّد الكلمه عدوا البطانه
اللي يبي جمع الشوش ويعقدها
متعلمٍ مجمل اسلوب اللعانه
للحق يابا والوجيه يعبدها
ابليس ماعمره فرق عن قرانه
والمشكله مايختفي عن وعدها
لو راهن المطرود يكسب رهانه
يجيب علم الشّاذه من بلدها
ما اقول قولٍ مالتزمت بضمانه
ما قدم الحجه واضيع سندها
ماخصّ احد واقول هذي بشانه
تمشي على المقصود واللي قصدها
وكلٍ يتابع بالجرايد اعلانه
ويشوف سعر العمله اللي رصدها
ولاصافت الدنيا ملوك الكنانه
ماباقي الا معجزتهم وحدها
هذا السبب معروف ماهي كهانه
من درّج الخلفه عرف وش ولدها
لافي قسى الدنيا ولا بالليانه
عجزت اميّز بنيها من هددها
احدٍ تغني له من أول زمانه
واحدٍ يقابلها ويخطي سعدها
ولا احدٍ بمجهوده يحدد كيانه
كم مالكٍ لزراعةٍ ماحصدها
وصلوا على المبعوث بآخر ديانه
اعداد ضخات العروق بجسدها
شريف الفريدي
