لو قريتي بس.. ما فوق السطور

كان عمري ما مضى كله كتابه

آه لو تدرين عن ذاك الشعور

آه لو قلبك على غفله درابه

آه لو تضوين ليل الحب نور

مثل شمسٍ نوّرت وجه السحابه

ما عرفت أن الحزن مثل السرور

قبل أعرفك ضحكة الفجر وغيابه

قلبي اللي نبض خفقاته غرور

ما سأل قلبك.. ولو حلمه جوابه

قلبي اللي يرسم لذكراك سور

ما نسى ليلة نساك إلا.. عتابه

لا تظنين الوفا حيله صبور

الحبايب صدقيني ما تشابه

للحقيقة عين ما تبكيك زور

والغلا ما يروي الغالي سرابه

من يقابل لهفة الشوق بفتور

لا تعجب.. لو هجر زايره بابه

والغياب اللي تسمينه حضور

ما يليق بحضرة الحب وجنابه

لو تضيق بغلطتك صحرا الصدور

ما نوى يشكي لك المجروح ما به

من كتبتك خفقةٍ بين السطور

ما كتبت إلا عن البعد وعذابه