مليت من كثر الأماني ومليت

من جرحي اللي كن ماهو بجرحي

ومن طبعي اني لا تضايقت.. غنيت

و ان ضقت من ليلي.. تزبنت صبحي

حلفت ما أتمنى.. ولكن تمنيت

ما تفسد أحزاني.. من اليوم فرحي

ياليت قولي وش معانيك.. ياليت..

عجزت عن وصفك.. وشرحك.. وشرحي

ياليتني من قبل ما أخلق توفيت

ولا أشوفني حي ن وانا أشوف ذبحي

أستغفر الله كان ياربي أخطيت

من وادي أشعاري الى شوق طلحي

خذيت من دنياي.. للناس وأعطيت

والله ماني حاسب حساب..ربحي

راضي بهالقسمه لو أني تساويت

بالقبر وأحسب عاد جمعي وطرحي

ولا ضاقت الدنيا.. بعيني.. تحديت

الوقت والعالم وطيبي وسمحي

البارحه من نزعة الخلق ونيت

والوقت يكتب كثر ما الوقت يمحي

شديت شعري غيض.. لكني أزريت

و لعنت قلبي بس من زود نصحي

يا حزة خنتي جميع المواقيت

لك عقربينن.. بينهم صاب رمحي

ان كان ياعمري بدوني تعديت

يا دعوتي نامي معي عمر وأصحي

إلا بعد بزيدك امن الشعر بيت

لوما القصيده ذي.. ماطاااب جرحي

الشاعر/ محمد الغرير