فيصل الشريف يعود بلوحة شعرية بهية:
تخلل الصمت نبض الخافق المنسي
وعيوني تسولف وتحكي على عيونك
تنظر لك الطاولات ويحضنك كرسي
والنور يبغى يصير بشكلك ولونك
كنك تقولين: (ماني من بني جنسي)
معذورة الله يلوم اللي يلومونك!!
تتشرّه أيامي إن جيتي على أمسي
تتشتت أحلامي إن رحتي على هونك
يا بسمة سنين عمري.. يا جنى غرسي
وشلون كنت أقدر أستوعبني بدونك؟!
قبلك: وأنا (مُهْمَل) وما قد بدت شمسي
بعدك: وأنا (مُلْهِم) التاريخ بجنونك!!
تغيرت كل الأشياء.. حتى أنا (نفسي)
تركت هالكون وأبغى أكون في كونك
(أماني العاشق المتباينة).. ترسي
على مواني رضاك وضحكة سنونك
خذي من الحب كل الحب.. وانغمسي
في لهفة اللي يسوق الريح لغصونك
لو ملّ صمتي ثواني قلبي المنسي
ما ملّت عيوني الثرثارة عيونك!!
فيصل الشريف
