هذه القصيدة ألقاها مساء الجمعة الماضي الشاعر السعودي ناصر القحطاني في مملكة البحرين الشقيقة في الأمسية الكبرى التي جاءت بعنوان (خليجنا واحد) ابتهاجاً باستقرار مملكة البحرين وتأكيداً للانتماء لمنظومة دول مجلس التعاون الخليجي، بمركز عيسى الثقافي بالعاصمة المنامة، وشارك فيها مجموعة من شعراء الخليج ومن ضمنهم الشاعر ناصر القحطاني.
سلامي على بحرينكم يا هل البحرين
على شوفة الأحباب ما فيه تأخيره
سلامي على اللي حط منزالكم في العين
وحث الخطى للمجد من حسن تفكيره
سلامي على اللي طلته في القسا واللين
تساوت بوجه ما عرف يوم تكشيره
رسالة غلا مختومه بنخله وسيفين
حملها السلام اللي دريتوا باساريره
سلام السعوديه.. سلام السعوديين
هل الطيب والنخوه والاخلاص والغيرة
يسلم عليكم شيخنا خادم البيتين
أبو متعب حزام السعد طيب السيرة
إلى مد يد العون ما احد وراه يعين
يحط الصعاب بكبرها حبة شعيره
وابلغكم جزال التحيات يالغالين
من السيف الاجرب سيف الاجداد ما غيره
خذا في ضيافتكم سنين وراها سنين
ولا حصّل من بلادكم غير تقديره
ترى الجسر وحده ما ربط بين اهلنا بين
علاقاتنا ولفٍ من الصعب تفسيره
ونبقى عليها دام حنا من الحيين
ما دام الدول ما بين جرفٍ ودحديره
إلى صد الاسطول وتخاذل عدو الدين
نقول احتزم يا جار حنا هل الجيره
نوقّف ونصطف ونجي مثل سور الصين
ونعمل عليه ان حس بالخوف دويّره
على الدوله تقّدر حقوق المواطن زين
وعلى الفرد ما يعشق ورا ديرته ديره
وانا خابر البحرين توجد بها الثنتين
كبيرة مقام وشان.. لو قالوا صغيره
الا يا اهل البحرين لا ننقسم نصّين
عسى كل بيت يزيد بالحب تعميره
الشاعر / ناصر القحطاني
