كن السفر - من كلامك - موعده قرّب

يا ساكن الروح.. روحي لا تغرّبها

أرجوك.. تكفى ترى مغليك ما جرّب..

فرقاك عقب الغلا واخشى يجرّبها

إن كانت مزوح عادي شرّق وغرّب

وإن كنت صادق يمينك لاتقرّبها

أخاف روحي على يمناك تتسرّب

وأبقى بدن.. لاتسر ولا يسرّ بها

يا متوه العقل.. يا تيّاه.. يا معرّب

يا معوّد النفس دربك دون ادرّبها

أنت الوحيد الذي لعيونه اتقرّب

والناس لو تقترب منّي مقرّبها

تدري مااحب الموادع حيل واتهرّب

من موعدٍ تتبعه فرقى تخرّبها

يعتلّ نبضي واحس الحزن يتشرّب

بعروق دمي ودمعاتي يسرّبها

لا عاد تطري السفر تقفي وتتغرّب

يا ساكن الروح روحي لا تغرّبها

منصور البقعاوي