حيّيت يا صقر العروبة بعد جيت

حييّت يا راع الفعول الحميدة

حلّت بنا الفرحة معك يوم حلّيت

نور الرياض أشرق ونورك يزيده

أنا أحمد الله يوم جيت وتشافيت

هديةٍ لك يا بومتعب جديدة

الله يبارك لك على ما تمنّيت

ويمد في عمرك ليالٍ مديدة

بديت عهدك يا أبيض الوجه بالبيت

وزرت المدينة مسجد أفضل عبيدة

يا خادم البيتين يا عالي الصّيت

نجدد لك البيعة بكلمه وكيد

شعبك يحبك وأنت للشعب حبّيت

قبل أمس عيد وشعبك اليوم عيده

حظّي سعيد إنّي على اسمك تسمّيت

ومن سعد حظّي دايم اسمك نعيده

يا مسندي وافي وتوفي ووفّيت

وعفيت عن ذيك الوجيه المريدة

مدّيت للشايب يمينك ولبّيت

ما يطلبه لو كان غيرك يكيده

أنت الذي ليا من قسى الوقت له جيت

شيّال عسرات الحمول العنيدة

وأنت الذي للّي تحدوا تحدّيت

يا منشّفٍ دم العدو في وريده

وأنت الذي في قمة المجد عدّيت

مواقفك بين المواقف فريدة

وأنت الذي محبوب إن رحت وإن جيت

كل الدول من طيبتك مستفيدة

حاكم حكيم ومن رجالٍ نعاتيت

نظراتهم للكون دايم بعيدة

وولي عهدك يوم للعهد ولّيت

يا سعد من سلطان والله عضيدة

هذاك أبو خالد وأنا به تعزويت

كم من فقيرٍ زاد بأمره رصيده

رجل الدفاع موقّت الرّد توقيت

في روس عدوان الوطن والعقيدة

ونايف هو اللي نبّت الشيب تنبيت

الله يجيره من شرور المكيدة

أبو محمد ثبّت الأمن تثبيت

من جاء حدود الدار لازم يبيده

وسلمان ليا حدّك زمانك وناديت

ما فيه مثله بين كل البديدة

أطلب لكم ربي ليا أصبحت وأمسيت

تعيشون في الدنيا حياةٍ سعيدة

وحيّيت يا صقر العروبة بعد جيت

حييّت يا راع الفعول الحميدة

عبدالله السليس