نورٍ جلى عن ظلمة الليل جلباب

وطل الصباح اللي بالافراح معمور

والشعر لو انه حجر كان ينساب

يذوب من شوقه أحاسيس وشعور

وشلون دام ان الولاء روح والباب

مااسرج من القيفان واشعل من النور

يوم الخبر صافح محبين واصحاب

بعيونهم بقلوبهم صار منشور

هذا ملك والا بلا مدح والقاب

الصدق يقرا دون تفسير وسطور

الشعب حبه صدق والحب غلاب

دايم بذكرك وانت بالخير مذكور

عدلت واحبطت الجرايم والارهاب

وجبرت في عطفك اسى كل مكسور

من يوم رحت وخافق الشعب منصاب

وانت الذي حبك بالاعماق مبذور

ذهبت في رحله له رد وايجاب

وشفناك عقب السقم عافي ومسرور

غايب وفي صدر الملايين ماغاب

هذا الغياب اللي مواصيل وحضور

جمعت من حبك قريبين واجناب

اجمع عليك الشعب والامر بالشور

لاجلك يابومتعب بلاقيد وحساب

نفديك واللي صد ماهو بمعذور

شعبك وفي والخير باطراف الاسباب

اسقيت من مزنك مساحتنا البور

واللي رخص بعيون شعبه ولاهاب

اليوم دمه بين الاقطار مهدور

والا انت ماارخصت الوطن لاجل كذاب

والشعب من عطفك مرّفه وميسور

يوم الدول صارت رهينه للاحزاب

حنا لنا شرع الولي خير دستور

حزبك ترى شعبك على كيد الاغراب

دون الوطن ندحر طغى كل مغرور

كان الولاء زلّه ترى الشعب ماتاب

يبقى على عهدك بلا ضعف وقصور

من شعب يحملك أحاسيس واعجاب

وده يقول بتالي الشعر مشكور