حظوظ
اثر بعض الهرج يترك جروحٍ ما تطيب
توي افهم قولة (الله ولا جرح الكبود)
علةٍ تبطي ونسيانها حظ ونصيب
لازم ابلعها وأقول الصبر ما له حدود
استحالة
معوّض خير ياحيٍ وردت الما بدون حبال
يطول بك الوقوف وشربة الما ماتحصّلها
وقوفك عند راس البير ما يسقيك لو فنجال
ولاينفعك شوف الجمة اللي منت طايلها
جدل
انا ليا شفت العقيم من الجدل
أشعب ذلول الشعر في مدهالها
آخذ رسنها من محل إليا محل
واقطع بها وادي القصيد لحالها
توافيق
الصبر طيّب والمراجل توافيق
إصبر ولو ماطاعك الوقت طيعه
دنياك ماتعرف عهود ومواثيق
من يومها والغدر فيها طبيعة
