يا أهل القنص تخيّروا (حر) له شأن

امسرولٍ ريشه على الساق ضافي

من ماكرٍ ما ينوجد كود بيران

صكيمةٍ من يمّة الفرس لافي

يا فرّعوا له برقعه وسط ديوان

جلسة فهد في كامرات الصحافي

من كف عبد الله على كفّه ألوان

ما ناش كفّه ما يشوف العوافي

وإن نطحك يطري على البال سلطان

وافي ولا غيره بالأوصاف وافي

يقدح حدق عينه مقابيس نيران

من عين نايف ما عليه اختلافي

مستقعدٍ متنه مثل متن سلمان

اليا اعترض والا عطا الطير قافي

ولأحمد عليه من التواصيف نيشان

رزّة رقبته لا تطلّع وشافي

هذا هو اللي ما يثمّن بالأثمان

جميع ما يدفع ماهو فيه كافي