يا صدى الذكريات ويابقايا الجروح
وش بقالي بربك وش بقالي بعد
غير هم ٍ عنيدٍ وسط قلبي يفوح
والشقا زاد فيني لوعتي والنكد
آه ياليل يكفي طالبك لاتبوح
ما مضى لاتعيده لاتخون العهد
والله اني بصبري باني له صروح
اتصبر وحالي ماشكيته لأحد
في ونيني متاعب والمعاني تنوح
وده انه تبين آهتي والجهد
وكل مافي عيوني للمحبة وضوح
الوفاء من صفاتي عايش ٍ بالجسد
ورغم هذا وهذا هالمعاني تروح
عند ناس ٍ هواهم يشعلون الحسد
يا شقا ذكرياتي لاتزيد الجروح
وش بقالي بربك وش بقالي بعد
فهيد البقعاوي
