يا الله يا اللي رحمتك تكشف الضيق |
يا فارج اهموم الليالي والأيام |
تفرج لمن همه يجر المعاليق |
ومن زود حزنه تطلع الشمس ما نام |
اليوم أبو متعب عيونه مغاريق |
واللي شكا نار الحزن كيف ينلام |
استنكر الفرحة بوجهي ولا أطيق |
غير الهموم اللي بقلبي لها أيام |
من يوم راح أغلى وأعز المخاليق |
الشيخ صالح كلنا عقبه ايتام |
له فزعةٍ يفرح بها ناشف الريق |
اللي شكا هم الفقر عدة أعوام |
حرٍ طلع في عاليات الشواهيق |
ما فيه صرح إلا على قمته حام |
من الحناكي باليدين المطاليق |
نالوا على فعل الكرم تاج وأوسام |
في مدحهم تزهى التعابير وتليق |
لو ما وفا في مدحهم نظم الأقلام |
ويحتار في وصف الحزن كل تعليق |
والذكريات تمرني مثل الأحلام |
وعزاي برجالٍ تشيل المواثيق |
عياله بدربه يسيرون قدام |
واختامها دعوة لوال المخاليق |
تغفر ذنوبه وانت بالغيب علاَّم |
محمد متعب عبد الله الشعلان |
|
