يا نادي القرن والقرن انتهى بالحساب |
هذي مية عام مرت بالعدد والحساب |
وكل موسم للازرق يعتبر موسمه |
من يوم خط المؤسس صفحتين الكتاب |
وحروفه المبدعه تتوشح الاوسمه |
هذا خطابه وفعله في ثنايا الخطاب |
سطر إضاءات للتاريخ في معجمه |
من سيرة أبو مساعد بان وجه العقاب |
وفي نظرة ابن مساعد زانت الخاتمه |
أبيض يطرز امانينا بلون السحاب |
وازرق بلون البحر وامواج متلاطمه |
هلالنا مجدنا ولايجيه ارتياب |
واللي تكاثر علينا مجدنا يحلمه |
مثل الملك فعله مقدر وقوله مهاب |
له كلمةً واضحه ماهيب متلعثمه |
ابلغ من السيف واسرع من لعوج الشهاب |
واشد من غيرة الفارس على محزمه |
نادي يجيب البطوله في ذهاب واياب |
أصبح هو العاصمه في داخل العاصمه |
صناعة المجد ماهي نزوة وارتكاب |
صناعة المجد في صدر الزمن ملحمه |
لولا المطر مارتوى قلب العطش من سراب |
ولاتحوّم على وادي الظما حايمه |
ولولا الهلال السعودي والرجال الصلاب |
ما فاخرت آسيا بدروبها المعتمه |
معك معك ياهلال المجد صوت الشباب |
يا منبع الفن والابداع يا ملهمه |
وان كان راحت بطولة هي زكاة النصاب |
واللايمه ماعلى روادنا لايمه |
يا نادي القرن والقرن انتهى بالحساب |
وانت ابتدا لك شعاع الماس من منجمه |
هذي تحياتنا لك ياعزيز الجناب |
لك يا شبيه الوفا والريح والمكرمه |
انثر تحايا تحاياها على كل باب |
ابواب تاريخنا اللي بالذهب محكمه |
لمؤسس الصرح في وقت الحجر والتراب |
ولاسم عبدالله رحام البشر يرحمه |
ولبندر اللي معه فال المحبين طاب |
بندر محمد كبير وحجته مفحمه |
ولسعود وسعود بن تركي يهد الصعاب |
راعي مبادي وطبع الطيب عنده سمه |
ومحمد اللي يوفي للسؤال الجواب |
إذا وقف للشدايد موقفه يحسمه |
وليوسف المبدع اللي بعده الفن شاب |
في سيرته كل فن بريشته يرسمه |
ولسامي اللي ولاعمره عن النورغاب |
سامي وسامي زبون اللحظه الحاسمه |
وصالح ومنصور والفارس أبد ما يهاب |
وفيصل ونواف للتدريس والترجمه |
وللدعيع وخالد والنعم بالذياب |
وللشريدة على جهده وما قدمه |
ولرموزنا الحاضرين ومثلها للغياب |
كلٍ باسمه وكلٍ ينحسب مقسمه |
ولكل مخلص كتب حرفه بكل انسياب |
ولكل عاشق بكى بالليلة المظلمة |
وجوه وأحداث دارت في صميم الكتاب |
والقائمه لو حكينا طالت القائمه |
صوب المنصات سيري يا خفاف الركاب |
لوزادت الأنظمة لو جارت المحكمه |
والجاهل اللي تعداه الفكر والصواب |
شخبط بمرسم ولخبط وانكسر مرسمه |
ما ضاقت الواسعة من قول شر الدواب |
أخبارهم كاذبة وافكارهم عايمه |
صاروا مثل من في الصحرا يلم السراب |
ما يحسب الحق لأصحابه وهو يعلمه |
يا نادي القرن جمهورك رقى بالسحاب |
من شجع الموج الازرق ترتفع أسهمه |
واللي سأل عن مأثرنا فهذا الجواب |
هلالنا (القرن كله) يعتبر موسمه |
جدة |
|
