هذي ثلاث شهور والفكر حيران |
والنوم في عيني تلخبط نظامه |
أتابع الأخبار في كل الأحيان |
وأقول يا ربي تزيح الغمامه |
ما ارتاح بالي لين شفته بالأعيان |
في شاشة التلفاز واسمع كلامه |
متى يجينا طيب الذكر سلطان |
متى يجينا راجع بالسلامه |
ولي عهد المملكة طير حوران |
يا حي هالطله وهالابتسامه |
الشعب مشتاقٍ لشوفه وولهان |
حتى الرضيع اللي بسن الفطامه |
الله يردك للوطن يا خو سلمان |
ويصافحك شعبك وقصر اليمامه |
جعله طهور من المرض يا كحيلان |
ماجور ياراع الكرم والشهامه |
يا فزعة المظلوم كان الدهر شان |
والله لتفرجله وياخذ مرامه |
بقلوب شعبك لك مكان ومسكان |
حبك معمر لين يوم القيامه |
الشعب يدعوك شباب وشيبان |
حتى لو أنه ساجد في قيامه |
هداج تيماء يارده كل ضميان |
ماهوب رسٍ مامه مروى حيامه |
الخير في طلة محياه لابان |
ويفرض على كل الشعوب احترامه |
هو والكرم دايم رفيقين واخوان |
يفرح به اللي جاير الوقت ظامه |
غيث على شعبه من الخير هتان |
للطيب في وجهه ارسوم وعلامه |
لو أمدحه ما قالوا الناس غلطان |
المدح في الطيب طويل اخطامه |
سلمت ياراع المكارم والاحسان |
يا اللي لك من المجد ذروة سنامه |
يابن الزعيم اللي للأمجاد عنوان |
اللي عسى الجنة تبرد عظامه |
صقر الجزيرة مروي السيف شامان |
لامن عج الخيل ثور عسامه |
وحده بلاده من حديثه ل نجران |
ومن الخليج إلى علاوي تهامه |
عبدالعزيز اللي دحر كل شيطان |
يشهد له المصمك ويوم الرغامه |
وصلاة ربي عد همال الأمزان |
على الرسول اللي رفيعٍ مقامه |
سهل بن بندر بن حياد المقاطي |
|
