الله يشافي طيب الذكر سلطان |
ويرجعه للمملكة بالسلامه |
آمين قولوا معيه آمين يا خوان |
بين الأذان وبين وقت الإقامه |
طول غيابه في بلاد المريكان |
متى نشوفه وسط قصر اليمامه |
يبرى لبو متعب ملكنا بليهان |
يمشي نشيط ومشيته باستقامه |
تباشر بشوفه ارامل ويتمان |
ويفرح به اللي باهض الحمل ضامه |
بحر الندى راعي العطايا والاحسان |
يا سعد منهو بالشدايد حزامه |
لا قام ابو خالد على كايد هان |
حلال شرباك العقد بالصرامه |
ما تحصر أمجاده على كل ميدان |
لو قمت اعدد لين يوم القيامه |
طلق المحيا بالتواضع والإيمان |
دايم بوجهه تظهر الابتسامة |
غلى سموه بالجوارح والأذهان |
بقلوب شعبه بالسفر والإقامه |
تدعيله العربان حضر وبدوان |
والدار كله من جنوبه الشامه |
شرقه وغربه خيمت فيه الأحزان |
سودن فجوجه مدلهمن ظلامه |
حزنن على سلطان وأخوه سلمان |
ما شافهم من هلت إهلال عامه |
حكام نجد معدلة كل ميزان |
اللي بنو صرح الشرف والزعامه |
وصلاة ربي عد ماكاينن كان |
على الرسول المصطفى في ختامه |
علي محيميد الفريدي |
|
