على اليسار مقلط.. وعلى اليمين صالة
ضيوف جالسين
قهوجي يلم الفناجين
وينظر آخر ضيف منهم يهز فنجاله
ضيف يقبل من بعيد
يقوم صاحب المجلس طلال لاستقباله
شخص جالس على اليمين يهمس لجاره:
(هذا أحمد اللي جاي بس ماهو لحاله)
(من معه)؟
(يبدو لي أطفاله)
ويدخل أحمد ومعه ثلاث أطفال
وعند باب الصالة يستقبله طلال
والسلام عليكم..
[الكل يوقف
(هلا والله مرحبا عليكم السلام.. حي الله أحمد هلا وسهلا..
تفضل.. كيف الحال؟
(هلا طلال.. اعرفك على عيالي.. ابني صابر عمره ثمان سنين..
لا تستحي سلم على صابر
بنتي هالة.. ست سنين.. سلم يا ثامر على الجماعة..
وش هذا اللي في يدك؟!
اه.. سجايري والولاعة
عبدالمعين يطالع الساعة.. ويهمس لجاره
(كيف يجيب أطفاله؟! ؟؟؟ محد منا معه أطفاله..
ليش يجيب أطفاله..
ويجلس أحمد ويجلس حوله عياله
طلال يقول:
(ما شاء الله.. ياحليلهم.. الله يحفظهم ويحرسهم ويحميهم
ما شاء الله يا صابر.. ايش هالثوب الجديد
أحمد يقول وملء وجهه ابتسامة
( هذا صابر موهوب في التقليد قوم يا صابر قلد أصالة
والا تدري وري عمك كيف يركض سامي الجابر..
ينطلق صابر لخارج المجلس.. يرجع معه كورة يشوتها
تنزل من السقف ثمان لمبات مكسورة
أحمد يقول وملء وجهه ابتسامة
(شاطر يا صابر.. شفت يا طلال شقاوة هالعيال..
طلال يتمتم:
(ياحليلهم.. الله يحفظهم ويحرسهم ويحميهم)
(تعالي يا هالة سمعيهم وريهم أغنية ورقصة الخيالة
لا تستحي يا بنت ما فيه أحد غريب هذا عمك طلال
وهذا عمك مثيب
وهذا عمك عبدالمعين وهذا..... لا مؤاخذة أنت مين؟
- أنا عبدالكريم
(عبدالكريم.. تخيل يا أخي ما عرفتك لأنك يمكن ملتحي
لا تستحي يا بنت لا تستحي
تدري طلال هالة نجحت بامتياز
صوت مدوي ينفجر
آه يا ثامر ما اشطنك.. كسرت القزاز
أحمد يقول وملء وجهه ابتسامة
شفت يا طلال شقاوة هالعيال
طلال يتمتم:
(ياحليلهم.. الله يحفظهم ويحرسهم...!!
وش كنت أقول أيوا طلال كنت أقول هالة نجحت بامتياز
اعطيتها البارح فلوس
وقلت لها يا هالة ايش ما تبغي اشتري)
طلال يقول:
(مبروك. مبروك.. ايش تبغي تصيري لما تكبري)
هالة تتفل على طلال.. وتقول:
(ايش دخل أبوك)
أحمد يقول وملء وجهه ابتسامة
(شفت يا طلال شقاوة هالعيال
طلال يتمتم..
ياحليلهم.. الله يحفظهم....؟!!!
تعالى يا ثامر.. عد لعمك من واحد إلى العشرة..
ثامر يبتدي يعد
واحد.. اثنين.. ثلاثة.. سبعة
أحمد يقول وملء وجهه ابتسامة
دايم يعد ولما يوصل أربعة يلخبط
يالله يا ثامر من جديد
يبدأ ثامر من جديد
واحد.. اثنين.. ثلاثة.. سبعة
شاطر يا ثامر شفتوا كيف لخبط
ينفتح باب المقلط ويدخل النادل شايل دخون
والصالة في حالة جنون
وأحمد يصفق.. صابر وثامر يرقصون
طلال يقوم
(العشاء.. تفضلوا ... الله يحييكم
أحمد يقول
يالله يا أولاد الله يحميكم.. أتعشوا أول
بعدين سووا اللي تبون
يركض الأولاد قبل الضيوف. وللمقلط يدخلون
صابر يأخذ برتقالة.. يرميها على النادل..
يطيح المدخنة والدخون
ثامر هناك.. يكسر بياله.. ويرمي شظايا على اللي يأكلون
هالة ترمي على طلال صينية.. وتأخذ علبة مياه غازية
تخضها.. تخضها.. تخضها
وترقص رقصة الخيالة.. وتفتح العلبة
أحمد يقول وملء وجهه ابتسامة
(أيوه.. هذي رقصة الخيالة)
والضيوف في ثياب من المياه الغازية يرفلون
مجلس رجاله
على اليسار مقلط.. وعلى اليمين صالة
كل شيء فيها ما هو على حاله
قزاز مكسور.. سجادة محروقة.. غترة مشقوقة
صينية هناك مرمية
ضيوف مبللين بمياه غازيه
على وجه عبدالمعين جرح قطعي.. ومهلبية
نادل مصاب بحروق من الدرجة الأولى.. وجروح سطحية
كورة.. لمبات مكسورة
يظهر أحمد من المقلط وعلى وجهه ابتسامة
أكرمك الله يا طلال.. شايف شقاوة هالعيال
أقول طلال.. أشكر أم العيال نورة
العشاء كان رائع.. ما قصرت مشكورة
عشاكم يا جماعة بعد أسبوع عندي
لازم تشوفو ولدي الصغير؟!
آخر العنقود.. منصور.. عمره ثمان شهور..
شيطان يعقد.. أظن به معي صورة
شوف يا طلال هالصورة.. لا تغرك نظرته.. ترى والله ذكي مره
ما يضحك ولا يبكي لما يبدا أخوه تامر يعد
طلال صامت ما يرد
وترتسم على وجه أحمد علامة استفهام
ويتساءل في داخله
(طلال كن وجهه متغير.. أكيد أحد من هالضيوف زعله
مسكين طلال دايم في حاله ما يخلوه
زين جبت العيال سلوه)
ويخرج أحمد من الصالة.. فخور بعيال
تارك وراه مجلس.. كان مجلس رجال
وعلى اليسار بقايا مقلط وعلى اليمين شبه صاله
