هاض فكري في جديدات المثايل |
والخيال يجول بالارض الفضيه |
اتبع الجزلات في شتى الوسايل |
واتصرف بالحروف الابجديه |
ما كتبت حروفها الا بالدلايل |
لاجل اقدمها وحجتها قويه |
أدخل الميدان واسج الاصايل |
بالدروب الطيبات الابرحيه |
أخذ العبره وزيف الوقت زايل |
ولا بقى الا كلمة الحق النقيه |
من نطقها ترفعه والراس طايل |
دام معناها يفوق الجاذبيه |
عاش رجالٍ على القمه يخايل |
همته بالطيب والخطوه جريه |
ما اشعل الفتنه ولا شب الفتايل |
ولا تراجع للعصور الجاهليه |
من يدقق بالزمن شاف الهوايل |
يكشف علومٍ بها ذنب وخطيه |
ينزعج ما بين قال وبين قايل |
والسبايب كلها بالعنصريه |
التباهي والتفاخر بالاوايل |
يذكرونه بالصباح وبالعشيه |
ما يفيد الرجل في وقت الصمايل |
غير فعله كان عنده مقدريه |
ندري ان الطيب في كل القبايل |
ونارهم بالعز طول الوقت حيه |
ما دخلنا شك باصحاب الفعايل |
الرجال اهل المروه والحميه |
وان تخاطبنا وجينا بالجمايل |
ما لها داعي نسويها قضيه |
نرفع النضره ونبحث للبدايل |
ونتقدم بامر خلاق البريه |
ناخذ النهج المحقق للفضايل |
من كتاب الله ومن سنه نبيه |
أحمد بن سعود الحمد -الزلفي |
|
