واهني من تاب يا عبيد عن طرد الهوى |
الطريق اللي عجزنا لا ناصل منتهاه |
مع حبيب شلّني شلّ ملعون الثوى |
تلّ قلبي تلّ بيديه يا عبيد وخذاه |
وانقضى صبر المولّع بحبه وإنطوى |
طوية اللي كل هم بهالدنيا طواه |
وارتضى العزلة لحالة وحيدٍ وإنزوى |
سبّة اللي يسبي عقول من يلمح بهاه |
بعد طول فراقه المرّ.. قاسيت النوى |
لين شفت بعيني اليوم وش يعني غلاه |
يعني إني ورد يانع ومن بعده.. ذوى |
ويعني إنّه نبع صافي وأنا ضامي لماه |
ويعني إنه طبّ جرحي وجرحي والدوى |
ويعني إنه سادن الحسن ما حي معاه |
ويعني إنّه طلّة البدر لا منّه ضوى |
ويعني إنه دفتر العشق بشفاة الرواه |
بندر بن نواف الرشيدي |
|
