الهي خالق الإنسان من ماء مهين وطين

ونفخت الروح فيه وكونت قدرتك تصويره

خلقته من عدم وأتقنت فيه الحسن والتكوين

وتكفلت بشؤونه كلها وأحسنت تدبيره

رفعت أيدي لك يا مستجيب لدعوة الداعين

تيسر لي وتهديني طريق الخير والخيره

وتلهمني من الحكمة ما دل من الكلام الزين

وما دل من الكلام الزين موضوعه وتعبيره

أنا في ماقف فيه البيوت القاسيات تلين

علشان الملوك اللي ذخرهم طيب السيره

أمام المسلمين اللي بسيفه طوع العاصين

على نهج الكتاب اللي جعله الله تنويره

بعد سرى ذلولة نصرة لأجل الوطن والدين

ما نوّخها يا لين استأمنت ديرة ورى ديره

كساها بالأمان وعم في الأقصين والأدنين

وجمع شمل القبايل والفرح غنت عصافيره

زرعها شجرة خضراء وحط شعارها السيفين

شعار يعشقه قلب السعودي ما يبي غيره

وفي وقت وجيز أمن التطور بين حين وحين

نمت نهضة وطنا وأبهر العالم بتطويره

بعد كانت مساكنا من بيوت الشعر والطين

بدو والكل منا مدلياً دلوه على بيره

وفقرٍ بانين سوره علينا مثل سور الصين

ويطوينا لهب قيظن تطارد به معاصيره

على البيداء نسّير ونعبر بأقدامنا حافيين

ما يستر وجهه الرجال من شرهة مساييره

رحمنا الله وبدل حالنا واقفى الزمان الشين

زمان يذبح المسلم عفيف ويؤخذ بعيره

وبعد حقق مراده نام اخو نوره قرير العين

وريّح خاطره وارتاح من همه وتفكيره

وسلمها ملوك كلهم في قلوبنا غاليين

على كتاب الله وسنة نبيه واصلوا سيره

ملوك سطروا مجد الوطن والمسلمين سنين

وكلن عجز التاريخ بأمجاده وأساطيره

بنوه وعمروه وغادروه وشعبهم راضين

بعد كلن وضح دوره ومجهوده وتأثيره

وحنا اليوم في عز ومعزة خادم البيتين

زعيمٍ نابت في قلوبنا حبه وتقديره

ملك ما يختلف في سياسته بين الشعوب اثنين

على شعبه مضفي بشت عدله ما قصير خيره

وعلى يمناه زيزوم سوات السيف أبو حدين

أبو خالد سنام المجد والغيث وتباشيره

ولي العهد سقم اللي يبي يلعب على الحبلين

على صوته يشوش الجيش ويحرك طوابيره

وعلى أمن بلادنا نايف ما برر موقف الغاوين

تحت سيفه ما زعزع فأمننا إرهابي وتفجيره

ليا منه ومرنا بالتحرك ما نشدنا وين

نطيع أمره ومن ياقف نحانا يالله الخيره

ونا وشلون أبنسى اللي جميله في رقبتي دين

سلام الله على سلمان حاكم نجد وأميره

اخذ من رأس أبوه امن الشجاعة والدهاء واللين

وتشربها يالين الرأس غنت به سعاطيره

مزاياهم كثيرة تتعب التاريخ والتدوين

أجل وشلون يقدر وصفها شاعر وتفكيره

عطيناهم ولاء صادق مجاه الظن والتخمين

ونكسر شوكة الشيطان لا دقت مزاميره

ومن فتح الرياض ومدخل المصمك ليا هالحين

وحنا بالامان ابفضل خالقنا وتيسيره

وقولوا كلكم يا حاضرين وسامعين امين

عساها دعوة مع كل تهليله وتكبيره

رحمك الله يا خال الملوك وشاعر الجيلين

وعسى مسكنك في روضن تضاحك به نواويره

تباشرنا بجائيزتك وجينا كلنا عانين

ولا نحسب حساب البعد لو طالت مشاويره

يسوق اقدامنا قدرك ودونه ما حدانا البين

وش اللي يعذر الرجال لا قلت معاذيره

وتكريمك نعده يالسديري ثالث العيدين

وهذا يعتبر تكريم للشعر وجماهيره

يا رمز الشعر ذكرك حي وافعال الرجال تبين

لو ان الشعر من صرخت رحيلك ما كفخ طيره

بنيت من الحكم والعرف ما نور خطا الغادين

وصغت من الذهب والماس ما يذهل تصاويره

تناقله الرواه وصار ورث اسلاف للتالين

ويبقى لين يرث الأرض خالقها بتدبيره

تركي الميزاني

صفحة الجزيرة الرئيسية

الصفحة الرئيسية

رأي الجزيرة